يا شېھىت بول، يا شاھىت

ئابدۇۋەلى ئايۇپ

تورلاردا تارقىتىلغان خىتاي ھۆكۈمىتى ئۈستىدىن ئەرىز قىلىش ھەققىدىكى چاقىرىقنى ئاڭلىغان، ئاۋاز قوشقان، سۈرۈشتە قىلغان ئۇيغۇرنىڭ ئازلىقى يۈرەكنى تىلغاۋاتقان ۋاقىتتا دۇنيادىن سادا كەلدى. 5-يانۋار كۈنى بىر بۆلۈك زىيالىلار تەرىپىدىن چىقىرىلغان مۇراجەتكە تۈركىيەدىكى ئەڭ چوڭ ئاممىيۋىي تەشكىكلاتلارنىڭ بىرى بولغان تۈرك ئوچاقلىرى چاقىرىق ئېلان قىلىپ 81 ۋىلايەتتىكى تارماق تەشكىلاتلارنى ۋە بارلىق تۈرك خەلقىنى ئىمزاغا چاقىردى. ئەپسۇسكى بۇ مۇراجەتكە ئىمزا قويغان ئۇيغۇرنىڭ سانى ئارانلا 500 دىن ئاشتى. ئىمزا قويمىسىمۇ مەيلى ئىدى، ئەمما ئىمزا قويۇشقا قارشى چىقىپ توختىماي بايانات بېرىۋاتقانلارنى​ڭ ئايىقى ئۈزۈلمەيۋاتقانل​ىقى كىشىنى ھەيران قالدۇرىدۇ. چوقۇم مەن قۇرغان تەشكىلات قىلمىغان ئىشنى باشقىلار قىلماسلىقى كېرەك، مەن باشلىمىغان ئىشنى ھىچ كىم باشلىماسلىقى كېرەكمۇ؟ ئۇيغۇرنى مەندىن بۆلەكلەرنىڭ سۆيۈش ھوقۇقى يوق، ماڭا ئەگەشمىگەي تۇرۇپ قېرىنداشلارنىڭ داۋاسىنى قىلىش گۇناھمۇ؟ ياق، ئەكسىچە بۇنداق مەنلىك، مەنمەنلىك گۇناھ . چۈنكى مەنلىك، مەنمەنلىك كىبىردۇر، ئۇ شەيتانغا خاس، ئاللاھ نەپرەتكە لايىق قىلغان ئىبلىسقا مەنسۇپتۇر.
ئاللاھقا ھەمىدلەر بولسۇنكى ھەققانى مۇراجەت ئۇيغۇردا پەقەت ساداسىز قالمىدى. مۇراجەت كىشىلىك ھوقۇق تەشكىلاتلىرى، مۇخپىرلار ۋە جامائەت ئەرباپلىرىغا يوللانغاندىن كېيىن ياخشى ئىنكاسلار كەلدى. ئۇيغۇر تەشكىلاتلىرىدىن تۈركىيەدىكى شەرقى تۈركىستان مائارىپ جەمئىيىتىدىن ھىدايىتۇللاھ ئوغۇزخان، مۇساجان ئەر، دۇنيا ئۇيغۇر قۇرۇلتىيىدىكى دولقۇن ئەيسا، سەمەت ئابلا قاتارلىق قېرىنداشلار باش بولۇپ تارقاتتى. ھازىر ئىمزا قويغۇچىلارنىڭ سانى 5 مىڭدىن ئېشىپ كەتتى. ئەمما ئۇيغۇرنىڭ سانى يەنىلا ئاز، كۆپىنچىسى تۈركىيە ۋە غەرپ ئەللىرىدىكى ھەققانى كىشىلەردىن قوللاش كۆپ بولماقتا. ھالبۇكى ئۇيغۇرنىڭ قوللىشى ئاچقۇچ.
مۇراجەت ئېلان قىلىنغاندىن كېيىن نەتىجە بولۇشى كېرەك. نەتىجە ئۈچۈن كەم بولۇۋاتقىنى پاكىت قىيىنچىلىقى، چۈنكى بۇ مۇراجەت جامائەت پىكرى ھاسىل قىلىپ مەلۇم سانغا يەتكەندىن كېيىن بۇنى مۇناسىۋەتلىك دۆلەت ۋە كىشىلىك ھوقۇق ئورگانلىرىغا سۇنۇش كېرەك. دوكىلات سۇنۇلغاندا چوقۇم سانلار، ۋەقەلەرنىڭ مەنبەسى بولۇشى كېرەك. خۇددى »دۇنيا سۈكۈتنى چۈشەنمەيدۇ» دەپ جار سالغىنىمىزغا ئوخشاش، دۇنيادىكى كىشىلىك ھوقۇققا، زۇلۇمغا، باستۇرۇشقا قارشى ھەرىكەتكە ئۆتىدىغانلار بىز ئۈنسىز تۆككەن ياشنى چۈشەنمەيدۇ، بىر بىرىمىزگە تارقىتىپ يۈرۈۋاتقان رىۋايەتكە ئىشەنمەيدۇ، بىزدە يا ماددى، يا ئىنسانىي ھۆججەت بولۇشى كېرەك.
زۇلۇم، خورلۇق، ۋە خارلىنىشلار بارغانچە ئېغىرلىشىۋاتىدۇ. قېرىنداشلىرىمىز تىرىك تۇتۇلۇپ جەسەت بولۇپ چىقىۋاتىدۇ. خىتاي زېمىنىمىزغا ئەمەس ئائىلىلىرىمىزگە بېسىپ كىردى، تىلىمىزغا، دىنىمىزغا ئەمەس جېنىمىزغا قەس قىلىۋاتىدۇ. بۇ ھايات-ماماتلىق پەيتتە يا ئۆزىمىز شاھىت بولغىنىمىزنى دەيمىز ياكى شاھىتلارنىڭ قولىدىكى ماددىي ئىسپاتنى كۆرسىتىمىز. ئاللاھنىڭ كالامى قۇرئادنىكى شېھىت سۆزىنىڭ تومۇرى بىلەن شاھىت سۆزىنىڭ تومۇرى بىر ئىكەن. دېمەك ئاللاھ بىزدىن يا ھەق ئۈچۈن شېھىت بول، يا ھەققانىيەت ئۈچۈن شاھىت بول دەپ چاقىرىدۇ. زۇلۇمنى كۆرۈپ تۇرۇپ شاھىتلىقتىن ۋاز كېچىش، شاھىتلىقتىن قېچىش، شاھىتلاردىن بولالماسلىق زالىمنىڭ ئۆمرىنى ئۇزارتىدۇ. بۈگۈنكى زۇلۇم ئالدىدا بىز شېھىتلىق ياكى شاھىتلىقنى ئەمەس سۈكۈتنى، بىپەرۋالىقنى، ئىتىپاقسىزلىقنى تاللىساق زالىمنىڭ ئۆمرى ئۇزىرايدۇ، زۇلۇم مۇشۇنداق داۋام قىلسا ئۇيغۇر مىللەت سۈپىتىدە يوقۇلىدۇ.

Advertisements
This entry was posted in Uncategorized. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s